Rafiq Dadaş oğlu Cəfərov Astara rayonunun Ərçivan qəsəbəsində ziyalı ailəsində dünyaya göz açıb. Atası Dadaş Cəfərov ali təhsilli dil-ədəbiyyat müəllimi, anası Xeyrə xanım isə evdar qadın olub. 9 övlad (3 qız, 6 oğlan) böyüdüb boya-başa çatdırıblar. Rafiq müəllim evin 4-cü övladıdır. 8-ci sinifə qədər Ərçivan qəsəbə orta məktəbində təhsil alıb. 11-ci sinfi isə Bakı Fəhlə Gənclər məktəbində davam etdirmiş və Neftçıxarma üzrə 3 il operator işlədikdən sonra imtahan verərək Moskva Kooperativ institutunun iqtisadiyyat fakültəsinə qəbul olub və bu təhsil ocağını da müvəffəqiyyətlə bitirib.
Vətənə qayıdaraq öz ixtisası üzrə əvvəl Astara rayonunda mağaza müdiri, mərkəzi univermağın direktor müavini, sonra isə direktoru vəzifəsində işləyib. Axırıncı iş yeri olan Astara Balıq Ovu İstehlak cəmiyyətinin sədri vəzifəsində də ləyaqətlə çalışıb. Hazırda təqaüdçü olsa da, «Far-El» MMC-nin təsisçisi və direktorudur.
Rafiq Zəbani 1971-ci ildə ailə qurub. Dörd övladı – 2 qız, 2 oğlu var. Övladlarını vətənpərvər ruhda böyüdüb. Hər biri ali təhsil alıb.
Rafiq müəllim 2015-ci ildə həyat yoldaşı ilə birlikdə ağır avtomobil qəzası keçirib. 7 gün koma vəziyyətində qalıb. Komadan ayıldıqdan sonra onda uşaqlıqdan şair olmaq arzusu onu tək buraxmayıb.
Şair olmaq üçün söz axtarmır, söz onu məcbur edir ki, yaz, yarat. Gecə-gündüz qələmə sarılıb. Bir-birindən maraqlı, məzmunlu, fəlsəfi, lirik, satirik, məhəbbət və vətənpərvər mövzularında şeirlər yazıb.
Beləliklə, «Ölüm yuxusunun şairliyi» adlı ilk kitabı ərsəyə gəlib. Rafiq Zəbaninin şeirləri dillər əzbərinə çevrilib və müəllifə geniş oxucu rəğbəti qazandırıb.
Rafiq Zəbani zəhmətkeş, torpağa, vətənə bağlı, xeyirxah və dürüst insandır. Böyük nüfuz sahibidir. Zəhmətlə, alın təri ilə övladlarını böyüdüb. Yaşadığı kəndində bağ-bağat salıb, bol məhsul yetişdirib. Torpağa bağlılığı onu daha da gümrahlaşdırır. Onu məhəbbət şairi də adlandırırlar.
İlahidən ilham alan şairin ata-babası dövrünün sayılıb-seçilən ziyalılarından olub. Ana babası Hacı Kazım kişi Məkkə və Kərbəlada ziyarətdə olmuş və mütərəqqi fikirli, savadlı, ərəb və fars dillərini mükəmməl bilən el ağsaqqalı olub.
Rafiq Zəbani (Cəfərov) ata kökündən olan böyük nüfuz sahibi Hacı Bağır Cəfərov nəslindəndir. Rafiq Zəbani xeyirxahlıqda ata və ana kökünə çəkmişdir. Rafiq Zəbaninin evi bu gün də qonaqlı-qaralıdır. Qapısına gələni əliboş qaytarmır.
Rafiq müəllimin qovluqlara sığmayan aforizmləri, poemaları, şeirləri də çap olunmaq ərəfəsindədir.
Son dərəcə məhsuldar qələm sahibi olan Rafiq Zəbaniyə can sağlığı və yeni-yeni yaradıcılıq uğurları arzulayırıq.
Rauf İLYASOĞLU
«Həkəri» qəzetinin baş redaktoru,
«Qızıl qələm» media mükafatçısı,
şair-publisist
ÖLÜM YUXUSUNUN ŞAİRLİYİ
Azərbaycan ədəbiyyatı bu gün ən məhsuldar dövrünü yaşayır. Həm də ən acınacaqlı. Ələlxüsus da poeziyamız. Peşəkar və qeyri-peşəkar səviyyədə yazanlar yüzlərlədir. Hər birinin də özünün oxucu auditoriyası var. Lakin ədəbi tənqidin olmaması qeyri-peşəkarların daha da əl-qol açmasına şərait yaradır. Ədəbiyyatımızın başında duranların tutduqları vəzifəyə biganə münasibət bu gün dünyada özünəməxsus yeri olan ədəbiyyatımızın inkişaf prosesini xeyli ləngidir.
N.Gəncəvi, İ. Nəsimi, M.Füzüli, M.P.Vaqif, S.Ə.Şiravani, Aşıq Ələsgər, H.Cavid, M.Şəhriyar, M.Araz və neçə-neçə dahi söz ustadları olan Azərbaycan poeziyası min illik tarixə malikdir və dünya miqyasında kifayət qədər tanınır. Eyni zamanda zəngin şifahi xalq ədəbiyyatı və folkloru ilə seçilən poeziyamız zaman-zaman söz xridarları yetirməkdə davam edir. Hər dövr baş verən tarixi hadisələr və taleyüklü olaylardan qaynaqlanan ədəbiyyatımız yeni-yeni müəlliflərlə gündəmə gəlir. Çağdaş Azərbaycan ədəbiyyatında mövzu zənginliyi, yazı üslubu, mövzuya yanaşma manerası ilə seçilən yazarlarımız az deyil. İstər yaşlı nəslin, istərsə də gənclərin arasında. Belə maraqlı yazarlardan və maraqlı həyat yolu keçmiş insanlardan biri də əlinizdəki kitabın müəllifidir.
Rafiq Zəbani. Bu imza yəqin ki, hələ çoxlarınıza məlum deyil. Çünki o, hələ uşaq yaşlarından poeziyanı sevsə də, folklorumuza rəğbət bəsləsə də, gənc yaşlarından şair olmaq arzusu ilə yaşasa da? nədənsə buna çox da ürək etməyib.Ürəyindəki arzuları, sevgisi, ətrafında baş verənlər, həyata baxışı vaxtaşırı şeirə çevrilsə də dilinə gətirməyib...
Cəfərov Rafiq Dadaş oğlu bir qış günündə Azərbaycanın ən gözəl məkanlarından olan Astara rayonunun Ərçivan kəndində dünyaya göz açıb. Kənddəki orta məktəbdə səkkizinci sinifi bitirib. Doğulduğu məkanın gözəlliklərinə valeh olduqca, ayağının altındakı doğma torpağın ona verdiyi gücü hiss etdikcə, udduğu təmiz dağ havasını ciyərlərinə çəkdikcə, buz kimi bulaqların bal kimi şirin suyundan işdikcə içində bir Vətən sevgisi, Vətən əzəməti, vətənpərvərlik duyğusu boy atıb, yüksəlib, buludlardan yuxarı qalxıb. Gənc Rafiqi də özü ilə yüksəklərə aparıb. Və yüksəldikcə də ürəyi atlanan bu gənc oğlanın qəlbindən dilinə vətən sevgisi ilə dolu poetik misralar axıb. Sonra bu misraların, bu şeirlərin, bu poetik duyğuların mövzusu genişlənib, sevgi şeirləri yaranıb, ana, ata haqqında şerlərə çevrilib. Biraz da yaşa dolduqca ətrafda baş verənlərə də münasibətini poetik dillə ifadə edib. Amma şair olmaq arzusu nə qədər güclü olsa da? şeirlərini ortaya çıxarmayıb. Lakin həyatında baş verən bir hadisədən sonra... Bu barədə birazdan.
XX əsr öz keşməkeşliyi ilə Azərbaycan ədəbiyyatından da yan keçməyib. Üsyanlar, inqilablar, çevrilişlər, müharibələr, kolxoz quruculuğu və sosialist ideologiyası bir sıra tarixi şəxsiyyətlərlə yanaşı adları tarixdə qalan yazarlar da yetişdirib. Onları sadalayıb vaxtınızı almaq fikrində deyiləm. Mənim fikrimcə hazırda danışdığımız Azərbaycan dilində yazan şairlərin ən mükəmməli XIX-XX əsrlərdə yaşamış Aşıq Ələsgər və XX əsr Azərbaycan poeziyasının ən görkəmli nümayəndəsi olan Səməd Vurğundur. Aşıq Ələsgərin yazdıqlarının hamısı bu günə də aktualdır və yüz illər də bundan sonra aktual olacaqdır. S.Vurğunun isə bu barədə “bəxti gətirməyib”. O və müasirlərinin hamısı sovet ideologiyasını tərənnüm və təbliğ edən əsərlər yazmaq məcburiyyətində qalıblar. Azacıq çərçivədən kənara çıxanlar isə bildiyimiz kimi repressiya qurbanlarına çevriliblər. Ötən əsrin 60-70-80-ci illərində yaşayanlar yaxşı bilirlər ki, hətta xarici müəlliflərin yazdığı əsərlər yalnız sovet ideologiyasına uyğun olduğu halda sovet xalqlarının dillərinə tərcümə oluna bilərdi. İnternetin və başqa sosial şəbəkələrin olmadığı bir dövrdə, SSRİ sərhədlərindən quşun belə səkə bilmədiyi bir dövrdə biz belə əsərləri oxumaq məcburiyyətində idik... Və oxuyurduq... Və elə bilirdik ki, dünyada bizdən xoşbəxt, bizdən düzgün yaşayan yoxdur... Nəisə, bunları sözgəlişi dedim. Yəni bu gün belə qadağalar, belə məhdud ideologiyalar, belə dar düşüncələr yoxdur. Fikir azadlığımız, söz azadlığımız var. Müəyyən qadağalar olsa da hər kəs istədiyini yaza və çap etdirə bilir.Saysız-hesabsız mətbəələrdə hər gün xeyli adda yeni-yeni kitablar nəşr olunur və oxucuların ixtiyarına verilir. Bundan başqa TV kanallar, sosial şəbəkələr, dövri mətbuat və s. insanların dünyagörüşünün artmasına, ətrafda və dünyada baş verənlərə fərdi münasibət bildirmək imkanı verir. Belə şəraitdə yeni imza ilə, yeni bir kitabla oxucuların görüşünə gəlmək, yeni söz demək həm çətin, həm də məsuliyyətlidir. İllərdir ürəyində qoruyub, bəsləyib, saxladığı şair olmaq arzusunu nəhayət ki, Rafiq müəllim üzə çıxarmaq üçün qərar verdi və bu nəfis tərtibatlı kitabla sizin görüşünüzə gəldi.
Şairliyə gedən yol Rafiq müəllim üçün elə də asan olmayıb. Hə, yeniyetmə Rafiq doğma Ərçivandakı orta məktəbin səkkizinci sinifini bitirdikdən sonra paytaxta - Bakı şəhərinə gəlir. Şair olmaq arzusunu da özüylə gətirir. Amma bu arzunu qandallayıb, ürəyinin dərin, gizli bir guşəsində həbs edir. Rafiq müəllimin mənə tanış olan bu hissləri çoxdan yazdığım bir şeri yadıma saldı. Nə vaxtsa bu hissləri mən də keçirmişdim və belə bir şer yazmışdım:
Şair olmaq istəmirəm
Heç bilmirəm, mən nə edim,
Tanrım, burax məni, gedim,
Ürəyimin sözün dedim,
Şair olmaq istəmirəm.
Mənimki dil xətasıdır,
Məni oda atasıdır,
Söz Tanrının ətasıdır,
Şair olmaq istəmirəm.
Ürəyimə soxulmayın,
Dərd-qəmimə toxunmayın,
Yazdığımı oxumayın,
Şair olmaq istəmirəm.
Didərgindi obam, elim,
Göz yaşımı necə silim,
Özümə düşməndi dilim,
Şair olmaq istəmirəm.
Bülbülündü gül, a qardaş,
Çox söz deyir dil, a qardaş,
Sözün qədrin bil, a qardaş,
Şair olmaq istəmirəm.
Şair olmaq müşkül işdi,
Sözüm alovlandı, bişdi,
Şerim dildən dilə düşdü,
Şair olmaq istəmirəm.
Kənddən Bakıya yol alan gənc Rafiqin başında isə daima bir fikir səslənməkdəydi:
- Şair olmaq istəyirəm!Bakıdakı Leninneft mədənlər idarəsində neftçıxarma üzrə operator işinə düzəlir. 76 saylı fəhlə-gənclər məktəbində orta təhsilini davam edə-edə mədəndə operator işləyir. Ona rahatlıq verməyən şairlik arzusu ürəyində hayqıraraq üsyan edir, azadlıq tələb edir. Bu arzusunu reallaşdırmaq istəyən qəhrəmanımız istedadını püxtələşdirmək istəyi ilə o vaxtlar Bakıda fəaliyyət göstərən ədəbiyyat dərnəklərindən birinə yazılır. Günlərin bir günü həmin dərnəyə rəhbərlik edən müəllim dərnək üzvlərinə belə bir sualla müraciət edir:
- İlk dəfə neçə yaşda sevmisiniz?
Gənc Rafiq də həmin suala –dördüncü sinifdə oxuyanda – deyə cavab verir. Belə bir cavab nəyə görəsə müəllimi hiddətləndirir və üzünü Rafiqə tutaraq – sən dördüncü sinifdə sevə bilməzsən, çıx çölə. Rafiq isə məntiqli cavabla müəllimi çıxılmaz vəziyyətə salıb:
- Müəllim, Nizami Gəncəvinin, Məhəmməd Füzulinin Məcnunu, Leylisi bir-birlərini sevəndə neçə yaşları vardı?
Cavab tapa bilməyən müəllim qeyri-iradi deyib:
- Sən zəbanisən, dərnəyi tərk elə!
O vaxt müəllim niyə belə deyib, gənc Rafiq dərnəyi tərk edə-edə ürəyində hansı hissləri yaşayıb, indi demək çətindir. Amma şair olmaq arzusunu müəllimin həmin sözlərinə görə dəfn eləmir qəlbində, əksinə bu istəyi bir az da güclənir.
Özüm də bilmədən şair doğuldum,
Çaylar kimi axıb, coşub çağladım,
Şair doğulmuşam, şair də oldum.
Ruhumu obama, elə bağladım.
Şairəm ürəyim boşalıb dolur,
Axtarıb hər sözün incisin bulur.
Deyərəm – məndən sorsalar əyər
Bir şair ömrü min ömrə dəyər.
Sonrakı illərdə Rafiq müəllim şairlik arzusunu nəzarətsiz qoymamaq üçün ürəyində yeni-yeni şeirlər qoşa-qoşa Moskva Kooperativ institutunun iqtisadiyyat fakültəsini bitirir. İqtisadiyyatçı diplomu cibində Astaraya qayıdanda yolboyu qəlbindən keçənlər ona rahatlıq vermir:
Daha şairlik arzuma - əlvida – mı deyim? Neçə illər mənə yoldaşlıq edən o “sədaqətli dost”u ürəyimdə dəfnmi edim? Mən axı şair olmaq istəyirdim?!... Şair olmaq istəyirəm!!! Mən axı istəyirdim, şeirlərim xalq bayatıları kimi dillərə düşsün, məclislərdə səslənsin, insanlara xoş ovqat gətirsin...
Şair olmaq arzusu içəridən onun sinəsini yumruqlayır, ürəyini didib-dağıdırdı.
Ürəkdi kamanım, ürəkdi sazım,
İstəyir özümdən mən özüm yazım,
Həyatı dərk edib duyduğum gündən
Şairlik məqsədim, şairlik arzum.
Mən şair deyiləm? olmaq istərəm,
Şairtək yaşayıb ölmək istərəm,
Yazdığım hər sadə bir sözümlə mən
Bəşərin ruhunda qalmaq istərəm.
Durnanı gözündən vurmaq istərəm,
Özümü özümdən sormaq istərəm,
Sevgidən saraylar qurmaq istərəm
Rafiqəm sözümdə durmaq istərəm.
Rayonda çalışdığı ilk işi satıcılıq oldu. Sonra mağaza müdiri, universal mağazada (univermaq) direktor müavini, direktor vəzifələrində çalışdı. 1988-95-ci illərdə isə Astara Balıq ovu istehlak cəmiyyətinin sədri işləyib. Harada, hansı vəzifədə çalışmağından asılı olmayaraq həmişə insanlarla mədəni rəftar elədi, nəzakət və mədəniyyətlə davrandı, onların hörmətini qazandı. Həm də içindəki şair olmaq arzusunu qorudu, saxladı, korşalmağa qoymadı, müxtəlif mövzularda şeirlər yazdı. Hərdən insanlarla şairanə ifadələrlə danışdı. Amma şeirlərini ortaya çıxarıb, çap elətdirmək, şair olmaq arzusunu reallaşdırmağa tərddüdlə yanaşdı. Rafiq müəllimin bu tərəddüdü özünə də təəccüblü gəlirdi. Axı o, uşaqlıqdan şair olmaq arzusunda idi...
Günlərin bir günü elə bir hadisə baş verdi ki, Rafiq müəllimin həyatı büsbütün dəyişdi. O, 2015-ci ilin yanvar ayında çox ağır avtomobil qəzasına uğradı. Xəstəxanaya koma vəziyyətində çatdırılan Rafiq müəllim düz yeddi gün bu vəziyyətdə qaldı. Bunu həkimlər “ölüm yuxusu” adlandırırlar. Hər kəs “ölüm yuxusunda” olanın ayılacağına ümid etsə də, hətta ən peşəkar və təcrübəli həkimlər belə xəstənin oyanacağına yüz faizli zəmanət verə bilmirlər. Bu vəziyyət bəlkə insanla Yaradanın baş-başa qaldığı bir zaman, insanın axirətə səyahət etdiyi bir müddətdir. Ailə üzvləri, qohumlar, tanıyanlar xəstəxanaya dəstə-dəstə gəlirdilər, xəstənin halı ilə maraqlanır, onun hələ oyanmadığını bilincə məyus olub, geri qayıdırdılar. Xəstə isə bəlkə də ölümlə-olum arasında çarpışa-çarpışa hələ də şeir yazırdı. Bəlkə də ulu Yaradandan şairliyə rüsxət istəriyrdi.... Və yeddi günlük “ölüm yuxusu” başa çatanda Rafiq müəllim yenidən gözlərini açdı, həyata qayıtdı. Özü də artıq əlli il ürəyində gəzdirdiyi şair olmaq arzusuna izn verilməsini hiss etdi. Bir müddət müalicəsini davam etdirsə də içində vulkan kimi püskürən şair olmaq arzusunu daha cilovlaya bilməyəcəyini hiss edirdi. Daha heç o arzunun qarşısında durmaq fikri də yox idi. Çünki o arzu anbaan şeirə çevrilərək sel kimi üstünə gəlirdi. Daha bu selin qarşısını almağa gücü yox idi. O vulkanın hərarətinə dözmək mümkünsüz idi. “Ölüm yuxusunun şairliyi” nə yaman olurmuş. Qərara gəldi ki, on illərlə ürəyində gəzdirdiyi şeirləri kağıza köçürtsün, çap etdirsin.
Ömür adlı qatardayam
İllərdir ki, yollardayam,
Ömür adlı qatardayam,
Harda haqq var, mən ordayam,
Haqsızların divanıyam.
Öz xalqımın şairiyəm,
Vətənimin əskəriyəm,
Milyonların mən biriyəm,
Məzlumların həyanıyam.
Ulduzam, Ayam, Günəşəm,
Səmalardan ələnmişəm,
Eşq oduna bələnmişəm,
Sevgilimin cananıyam.
Azərbaycan - doğma elim,
Çəmənlərdə qönçə gülüm,
Nəğmə deyir şirin dilim,
Şair Rafiq Zəbaniyəm.
Nəhayət şeirlərini torplayıb, kitab halına salmaq qərarını verdi. Təxəllüs barədə düşünəndə yadına ilk düşən əlli il əvvəl dərnək rəhbərinin ona dediyi – sən zəbanisən – ifadəsi oldu. – Rafiq Zəbani – pis deyil deyə düşündü. Bax beləcə əlinizdəki bir ömrün şair olmaq arzularını özündə gəzdirən insanın ilk şeirlər kitabı gəldi dünyaya. Mən Rafiq Zəbaninin bu ilk kitabı haqqında, kitabda toplanan şeirlər haqqında heç bir fikir, rəy bildirməklə sizin kitabdan alacağınız təəssüratları istiqamətləndirmək istəmirəm. Çünki özünüz oxuyacaqsınız, şairin bir ömürlük şair olmaq arzusuna yoldaş olacaqsınız, yalnız “ölüm yuxusu”ndan sonra qərara gəldiyi şairliyə şahidlik edəcəksiniz. Hardasa gəncliyinizi, hardasa sevginizi xatırlayacaqsınız, hardasa Vətəni xəyalən gəzəcəksiniz, hardasa gözləriniz xəyallanıb, yol çəkəcək. Bir şair qəlbinin çırpıntılarını eşidin, ürəyinin döyüntülərini dinləyin. Allah köməyiniz olsun. Artıq növbəti kitablarını çapa hazırlayan Rafiq Zəbaniyə də hamılıqla yeni-yeni zirvələrin fəthində böyük uğurlar arzulayaq.
Hörmət və ehtiramla
German
şair-publisist
Rafiq Zəbani (Rafiq Dadaş oğlu Cəfərov)
AY ATA
Qeyrətinə qurban olum, ay ata,
Vətən deyib, sən yollandın cəbhəyə.
Yağı düşmən qənim oldu həyata,
Sinə gərdin güllələrə, qəlpəyə.
Qeyrətinə qurban olum, ay ata,
Reyxstaqa bayraq sancıb, qayıtdın.
Vətən üçün vuruşduqca, ay ata,
Ürəyimdə vətən eşqi oyatdın.
Qeyrətinə qurban olum, ay ata,
Köçüb getdin bu dünyadan nigaran.
Qarabağın qalıb tapdaqlar altda,
Yanıb-yaxılardın buna hər zaman.
ƏZİZ ANAM
Əziz anam, mən qürbətdə yaşadım,
Vətən dərdin öz kədərim sanmadım,
Vətən dedim, mənasını qanmadım,
Əziz anam, Vətən səndən yadigar,
Vətən şərəf, Vətən qeyrət, Vətən ar.
Düşmən gəlib Qarabağı alıbdı,
Xalqımızı dərdə, qəmə salıbdı,
Qarabağım qarabaxtlı qalıbdı,
Vətən səndən, mənə qalıb yadigar,
Vətənimdə at oynadır yağılar.
Əziz anam, Qarabağı almağa,
“Misri”sini, “Cəngi”sini çalmağa,
Düşmən üstə son qələbə çalmağa,
Koroğlunun Qır atına atlanım,
Vətən üçün hər əzaba qatlanım.
Əziz ana, xeyir-dua ver mənə,
Qan uddurub, zərbə vurum düşmənə,
Zəfər müjdəsini verim Vətənə,
Şəhidlərin ruhunu biz şad edək,
İgidlərin adlarını yad edək.
GÖZ YAŞI
Axan göz yaşlarım əridir daşı,
İnsanın qəlbi də daşa dönərmiş.
Nədir bu küdurət sevənə qarşı,
Ömrün baharı da qışa dönərmiş.
Axan göz yaşlarım nalədir, ahdır,
Yüksəlir köksümdən səmaya sarı.
İncitmə aşiqi, axı günahdır,
İnsaf et, könlümü ovundur barı.
Axan göz yaşlarım məhəbbətimdir,
Dillənər könlümün qəmli udunda.
Axan göz yaşlarım sədaqətimdir,
Rafiqin bu sözün saxla yadında.
MƏNİM AZƏRBAYCANIM
Bağçaların, bağların,
Uca-uca dağların.
Adın-şöhrətim, şanım,
Mənim Azərbaycanım.
Çeşmələrin çağlayır,
Gülləri sığallayır,
Hələ bundan sonradır
Sənin gözəl çağların,
Mənim Azərbaycanım.
Həyatımın özüsən,
Baxtımın ulduzusan,
Yaşamaram mən sənsiz,
Sən uşaqlıq çağlarım,
Mənim Azərbaycanım.
Kürün var, Arazın var,
Köksündə Xəzərin var,
Vurğun tək yazarın var.
Düşməninə göz dağım,
Mənim Azərbaycanım.
Hər tərəfin çıraqban,
Gecələrin al-əlvan.
Anamın yadıgarı,
Sən həm ürək, həm də can,
Vətənim Azərbaycan.
Gözəl yazın, payızın,
İqlimindən nə yazım,
Qara günləri pozum,
Uğrunda getsin canım,
Mənim Azərbaycanım.
Vardır Kürün, Arazın,
İqlimindən nə yazım,
Yaşa ürəyim, canım,
Mənim Azərbaycanım.
Baxçaların, bağların,
Uca-uca dağların.
Adım, şöhrətim, şanım,
Mənim Azərbaycanım.