Azərbaycan ictimaiyyətinə ağır itki üzv vermişdir. Tanınmış ictimai xadim, uzun illər rəhbər vəzifələrdə ləyaqətlə, şərəflə işləmiş Zöhrab Məmmədovun haqq dünyasına qovuşmasından 40 gün keçir.Zöhrab Əsəd oğlu Məmmədov 17 fevral 1941 - ci ildə Tərtər rayonunun Xoruzlu kəndində anadan olmuşdur.
Uşaqlıq və yeniyetmə illəri müharibə dövrünə təsadüf etmiş və rayonun başı papaqlı kişiləri 1941- ci illərdə cəbhəyə göndərilmişdir.
Çox çətin , keşməkeşli , ağır bir dövrdə orta məktəbi müvəffəqiyyətlə bitirdikdən sonra təhsilini uğurla davam etdirmişdir.
Azərbaycan Kənd Təsərrüfatı institutunu ( indiki Aqrar Universiteti ) bitirərək iqtisadçı ixtisasına yiyələnmişdir. Komsomol məktəbini keçmişdir.
Tərtər rayon komsomol komitəsinin katibi, sonra isə rayon qəzetinin redaktoru vəzifəsində çalışmışdır. Yuksək təşkilatçılıq bacarığı nəzərə alınaraq Zohrab müəllim partiya işinə irəli çəkilmişdir.Rayon Partiya komitəsində şöbə müdiri vəzifəsində işləmişdir.
Ulu öndər Heydər Əliyevin Respublikaya rəhbərlik etdiyi dövrdə Zöhrab Məmmədov
1972 ci ildə Azərbaycan Respublikası Tərtər rayon Partiya Komitəsinin katibi vəzifəsinə təyin olunmuşdur.
1975 -ci ilə qədər bu vəzifədə ləyaqətlə çalışdıqdan sonra 1975-1977-ci illərdə SSRİ Kommunist Partiyasının Mərkəzi Komitənin nəzdindəki Ali Partiya məktəbində təhsil almışdır.
Öz bacarığı və təşkilatçılıq qabiliyyəti nəzərə alınaraq 1977-1980-ci illərdə Zöhrab Məmmədov Azərbaycan SSR Kommunist Partiyası Mərkəzi Komitəsində təlimatçı vəzifəsində çalışmışdır.
Azərbaycan KP MK - nin Birinci Katibi Heydər Əliyev təcrübəli iqtisadçı olan Zöhrab müəllimin təşkilatçılıq qabiliyyətini nəzərə alaraq onu daha məsul vəzifəyə təyin etmişdir.
Belə ki, Zohrab Məmmədov 1980-1985-ci illərdə Qubadlı rayon Partiya Komitəsinin birinci katibi vəzifəsində ləyaqətlə işləmişdir. İşlədiyi müddətdə Qubadlı rayonunda geniş tikinti- abadlıq -quruculuq işləri görülmüş, kənd arası yollar cəkilmiş, kənd təsərrüfatı, xüsusilə heyvandarlıq sahəsi inkişaf etdirilmiş, əhalinin dolanışığı xeyli yaxşılaşdırılmışdır. Zöhrab Məmmədov
1985-1990-ci illərdə Abşeron rayonu Partiya Komitəsinin birinci katibi vəzifəsində çalışmışdır. Yüksək insani keyfiyyətlərə malik olan Zöhrab Məmmədov harada işləməsindən asılı olmayaraq dürüstlüyü, sadəliyi, mərdliyi, bacarığı, tələbkarlığı və insanlara olan diqqət və qayğısı ilə seçilmiş və Respublikada dərin hörmət və nüfuz qazanmışdır.
1990-1991-ci illərdə Azərnəşrin redaktoru olmuşdur Zöhrab müəllim sonralar Azərbaycan
Respublikası Prezidenti yanında Ali Nəzarət inspeksiyasının Hacıqabul və Əlibayramlı rayonları üzrə ali nəzarət inspektoru vəzifəsində işləmışdır. Bundan əlavə Zöhrab Məmmədov
Respublika Əmlak Komitəsində də bir sıra vəzifələrdə çalışmışır. “Ay-Ata” ASC-nin idarə heyətinin sədri olmuşdur.
Zəngəzur Cəmiyyətlər Birliyinin Ağsaqqallar Şurasının sədri, ictimai siyasi dövlət xadimi, müstəqillik aktını ilk imzalayan millət vəkillərindən biri olmuş Tofiq Mehdiyevin dediklərindən;-
Zöhrab Məmmədov Zəngəzur Cəmiyyətlər Birliyinin İdarə Heyətinin fəal üzvlərindən idi. Gənclik dövrümüzdən bir - birimizə bağlı dost olmuşduq.
İstər Tərtərdə, istərsə də Qubadlı və Abşeron rayonlarında işlədiyi dövrlərdə çalışqanlığı ilə həmişə el -oba arasında böyük hörmət qazanıb.
Şüurlu həyatını, bilik və bacarığını xalqımızın rifahının yaxşılaşmasına , dövlətimizin daha da möhkəmlənməsinə həsr etmişdir.
Qubadlı rayonuna rəhbərlik etdiyi dövrdə rayonun siması dəyişilmiş , iqtisadiyyatı daha da möhkəmlənmişdir. Əsl zəhmət adamıydı.
Sovet hökuməti dövründə mənfur qonşularımız- Qafan , Görüş və Sisiyan rayon rəhbərlərinin torpaq iddialarına, fitnəkar hərəkətlərinə qarşı mübariz olmuş və paxıl qonşular Zöhrab Məmmədovun cəsarətli, məntiqli sözünün qabağında hər dəfə susmağa məcbur olmuşlar.
Qubadlı rayon partiya Komitəsində məsul vəzifələrdə işləmiş , tarixçi, tədqiqatçı Razim Əliyev yaxın dostunun dəfn mərasimində ürək ağrısıyla etdiyi dost çıxışı hər kəsi çox təsirləndirdi.
Ehtiyatda olan polkovnik- leytenant Sucəddin Abdullayevin dediklərindən:
- General Məhəmməd Əsədovla Zöhrab Məmmədov yaxın dost idilər.Hər ikisi xalqını, dövlətini sevən şəxsiyyətlər idi.
Son dövrdə ölkədə gedən ictimai siyasi vəziyyəti təhlil edərək deyərdi;- Mən inanıram ki, Ölkə Prezidenti , Ali Baş Komandan İlham Əliyev qısa bir vaxtda torpaqlarımızı zor gücünə də olsa, yağı taptağından azad edəcək, onda ermənilər də çox peşiman olacaqlar. Həqiqətən də Zöhrab Məmmədovun mudrikcəsinə dediyi sözlər çin oldu.
Şanlı ordumuz qələbə qazanaraq yurdumuzu erməni quldur dəstələrindən azad etdi.
Doğma torpaqlarımızın, xüsusilə doğulduğu Tərtər rayonunun işğaldan azad olunan ərazilərini, eləcə də vaxtilə işlədiyi Qubadlı rayonunun düşmən taptağından azad edilməsi onu sonsuz dərəcədə sevindirirdi.
Arzusu vaxtilə işlədiyi Qubadlını qarış-qarış gəzmək, Həkəri və Bərgüşad çayını seyr edərək doğma el- oba ilə birlikdə mehriban görüşmək idi.
Zöhrab Məmmədov gözəl ailə başçısı idi.
Vətənpərvər övladlar böyüdürək boya- başa çatdırmışdır. Yaxşı yadımdadır.
Qəzetimizin təsisçisi və baş redaktoru olmuş yazıçı, aqronom, dövlət qulluqçusu təqaudçüsü olmuş Hacı Əli Xankişiyevin 70 illik yubileyində Zöhrab müəllimin çıxışı qələm adamlarına olan sonsuz ehtiramın bariz nümunəsi idi.
Bu gün Əli müəllim də, Zöhrab müəllim də xatirəmizdən silinmir. Çünki xalqını, vətənini , dövlətini sevən, əqidəsi saf olan insanlar xalqın gözündə ən uca zirvədə dayanırlar.
Zöhrab Məmmədovun 80 illik yubileyi yenicə qeyd edilmişdi.
Gəlimli gedimli dünyada hər kəs müvəqqəti ömür yaşayır. Yaxşı ad qazanmaq, xalqın hörmətini, ehtiramını qazanmaq isə hər kəsə nəsib olmur. Zöhrab müəllim yaxşı ad qazanmış ağır taxtali kişilərdən idi.
24 mart 2021-ci ildə amansız ölüm onu da haqladı və beyin xərçəngindən vəfat etmişdir. Pandemiya dövrü ərəfəsində bu xəbər dostları, doğmaları çox sarsıtdı.
Zöhrab müəllimə Allahdan rəhmət diləyir, ailə üzvlərinə, oğlu Şəhriyar qardaşımıza, doğmalarına uca Rəbbimizdən səbr diləyirik .
Son dərəcə vətənpərvər, dosta sədaqətli ziyalı olan Zöhrab Məmmədov haqq dünyasına qovuşsa da , onun gördüyü xeyirxah işləri heç zaman unudulmayacaq və onu tanıyan dostlarının, əzizlərinin, el- obamızın yaddaşından uzun illər silinməyəcəkdir.
Ruhun şad olsun Zöhrab müəllim.
Rauf İlyasoğlu.