Bu gün anamın dünyasını dəyişən gunudur. Düz 16 il əvvəl , yəni 17 dekabr 2005- ci il. Atamın ayrılığına dözməyərək 5 aydan sonra anamın da dünyasını dəyişən gün.Həmin illər mən nələr çəkdim, ilahı. Beş ay ərzində həm ata itirmək, həm də ana itirmək necə də ağır imiş...O illəri xatırlamaq çox kədərli və üzüntülüdür.
1993- cu illərdə anam vətən həsrətinə dözməyərək insult kecirtmişdi, Bir tərəfi qurumuşdu. Ağdamın Quzanlı qəsəbəsində finlərin tikdikləri kardon evlərdə məskunlaşmışdılar. Pulumuz da yox idi. Yerimiz, yurdumuz erməni quldurları tərəfindən işğal olunaraq dağıdılmışdı. Həmin illərdə Bakı Kamvol kombinatında gənc mütəxəssis olaraq işləsəm də, bir ayağım Ağdamda idi. Əmək haqqım da çox az idi. Atam mənə zəng edərək demişdi: Sən Bakıda niyə qalmısan? İki qardaşın döyüşür, gəl sən də torpağı qoru. O vaxtdan işimi dayandırıb Ağdama gəlmişdim.
Xocalı soyqrimı mənə çox pis təsir etmişdi.
Bir tərəfdən də anamın xəstəliyi, Ağdam itgisi məni çox sarsıtmışdı .
Həkim çoxlu dava dərman yazmışdı. Anam qızıl üzüyün (nişan üzüyün) barmağından çıxardaraq dedi; Vaqif, apar sat, dərman al, borc eləmə.
Üzüyü dəyər dəyməzə satıb dərman aldıq. On il anam yaşadı, artıq əli, qolu işləməyə başladı, dili açıldı.Atam isə o illərdə çox təsirlənərək bu şeiri yazmışdı;
Səni mənəm yaşadan,
Ömrüm - günüm Sərəncam.
Tanrı köməyin olsun,
Qılsın dərdlərə əncam.
Gör bir neçə ildir ki,
Biz bir yolun yolçusu,
İllər necə tez keçir ,
Sanki axan sudur su.
Biz dünyanı görmüşük,
Hər bir dərddən halıyıq,
Balaların eşqinə,
Gülüm, yaşamalıyıq.
İlyas Qəmgin.
Atam da, anam da qardaşım Namiq də vətən deyə- deyə dünyadan köçdülər. Anama bəlkə də əvvəldən agahdır ki, nəvəsi Asiman böyüyərək döyüş dostları ilə birlikdə qısasımızı erməni quldurlarından alacaq və şəhadətə yüksələcəkdir. Ruhunuz şad olsun, şəhidlərimiz.
Ana, rahat uyu. Oğlun Niyaz şəhid atasıdır. Xəstəlikdən əziyyət çəkən Niyazla birlikdə gəlib bu gün məzarını ziyarət etdik.
Birinci qrup Qarabağ qazisi Hacı Həsən Hüseyni də, Hacı Həmdullah Əfəndi də yasin oxudular, ana!
Ruhun şad olsun. Məzarın ilahi nuruyla dolsun.
Rauf İlyasoğlu
“XeberTıme.az”