Əziz şagirdlər və onların onlayn tədrisdən nigaran valideynləri sizi maraqlandıran bir məlumatımız var. 9-cu siniflərin buraxılış imtahanları əvvəlki kimi iki mərhələli olmayacaq. Yəniii cəmi bircə dəfə keçiriləcək. Aidiyyatı qurumlar buraxılış imtahanları ilə bağlı yeni model hazırlayıblar. Dövlət İmtahan Mərkəzindən verilən məlumata görə, 9 və 11-ci siniflərin buraxılış fənlərinin proqramları həm də müəyyən qədər sadələşdirilib.
Bu ilki tədris ilinin sonunda 9-cu siniflərin buraxılış imtahanı yeni model əsasında keçiriləcək. Dövlət İmtahan Mərkəzi və Təhsil Nazirliyinin birgə hazırladıqları yeni model təsdiq edilməsi üçün aidiyyatı dövlət qurumlarına təqdim edilib. Yeni modeldə nəzərdə tutulur ki, 9-cu sinif buraxılış imtahanı əvvəlki illərdə olduğu kimi iki mərhələdə deyil, sadəcə bir mərhələdə keçirilsin.
11-ci siniflərin buraxılış imtahanının modelində isə hər hansı dəyşiklik olmayacaq. Buna baxmayaraq, koronavirusun tədris prosesinə təsiri nəzərə alınaraq, 9 və 11-ci siniflərin buraxılış fənlərinin proqramları müəyyən qədər sadələşdirilib.
Şagirdlər və abituriyentlər buraxılış imtahanlarının proqramı, habelə modeli haqqında yaxında nəşr ediləcək abituriyent jurnalının xüsusi buraxılışında tanış ola bilərlər.