Ağdamım-Elburus Qayalı.
Ziyarət yolumuz dönübdür aha,
Ümid bağlamışıq böyük Allaha.
Yoxluğun mənimçün ölümdən baha,
Gözlərindən qan-yaş olub ha damım,
Çatarmı de, köməyimə, Ağdamım!
Ziyarət edəydim Lazım ağanı,
Seyr edəydim gülümsəyən çağanı.
Yurda qaytar, yurda həsrət baxanı.
Xalqın vuran ürəyisən, Ağdamım,
Sən yurdumun dirəyisən, Ağdamım!
Demirəm doğmayam, demirəm yadam,
Demirəm naşıyam. ya da ustadam,
Mən də yurd həsrəti çəkən bir adam.
Qarabağın əzəlisən, Ağdamım,
Sən gözəllər gözəlisən, Ağdamım!
Həsrət kor edibdi, gözüm nigaran,
Qohumum-əqrəbam, özüm nigaran.
Yurda məlhəm olan sözüm nigaran.
Arzularım, diləyimsən, Ağdamım,
Sən hər zaman gərəyimsən Ağdamım!
Elburusam, qarlı dağlar oğluyam.
Öz elimə, öz obama bağlıyam,
Çətin bir də çaylar kimi çağlayam.
Ümid yerim, yarağımsan, Ağdamım.
Qaranlıqda çırağımsan, Ağdamım!
2005-ci il
Elburus Qayalı
Şair, 11 kitab müəllfi, AYB-nin üzvü, prezifent təqaütçüsü.