Beynəlxalq Qalereyada gənc rəssamların möhtəşəm sərgisi.
Azərbaycan incəsənət mühitində yadda qalan və ilhamverici bir hadisə baş tutdu. Beynəlxalq Qalereya gənc istedadların yaradıcılıq enerjisini bir araya gətirən unikal qrup sərgisinə ev sahibliyi etdi. Sərgi, xalçaçı rəssam, Gold School, Mir Talantov, Premium Tədris Mərkəzləri və Sabah kurslarının müəllimi Gülşən Mirzəyevanın tələbələrinin iştirakı ilə təşkil olundu.
Sərginin layihə rəhbəri Aygün Əzizova idi. Onun kuratorluğu altında sərgi peşəkar şəkildə hazırlanaraq həm estetik, həm də pedaqoji baxımdan yüksək səviyyədə təqdim olundu.
Sərgidə nümayiş olunan əsərlər müxtəlif texnika və janrlarda işlənmişdi: xalça eskizləri, dekorativ kompozisiyalar, rəngkarlıq nümunələri və tətbiqi sənət işləri. Tələbələrin fərdi baxış bucağı, rəng duyumu və kompozisiya bacarıqları tamaşaçılar tərəfindən maraqla qarşılandı. Hər bir əsər müəllifinin daxili dünyasını, estetik zövqünü və texniki bacarığını əks etdirirdi. Bu işlər, gənc rəssamların yalnız texniki deyil, həm də konseptual düşüncə qabiliyyətini ortaya qoydu.
Tədbiri giriş sözü ilə açan Beynəlxalq Qalereyanın direktoru Elnurə İsgəndərova sərgi iştirakçılarını salamlayaraq, Gülşən xanımın müxtəlif tədris mərkəzlərində çalışan tələbələri ilə birgə sərgi təşkil etməsini yüksək qiymətləndirdi. O, bu təşəbbüsün gənc istedadların bir araya gətirilməsi və onların yaradıcılıq potensialının üzə çıxarılması baxımından olduqca kreativ və dəyərli olduğunu vurğuladı. Gülşən Mirzəyevanın bu sərgi ilə sənətin yalnız fərdi yaradıcılıq deyil, həm də paylaşım, öyrətmə və birlik olduğunu sübut etdiyini bildirdi.
Sərgidə fəxri qonaq qismində bir sıra tanınmış şəxslər iştirak edirdi. Azərbaycan Dövlət Rəssamlıq Akademiyasının müəllimi Zinaida Mirzəzadə, rəssam-müəllim Səadət Nərmin Hacıyeva, Mir Talantov Təhsil Mərkəzinin rəhbəri Elvira Şabanova, Sabah kurslarının rəhbəri Jalə Məmmədova, Gold School Tədris Mərkəzinin rəhbəri Jalə Abdullayeva, Premium Tədris Mərkəzinin rəhbəri Gülnar Səmədova və fizika müəllimi Mailə Yusubova çıxış edərək sərgi iştirakçılarına uğurlar arzuladılar. Onlar bu cür sərgilərin gənc istedadların tanınmasına, sənətə olan marağın artırılmasına və tədris mərkəzləri arasında əməkdaşlığın güclənməsinə böyük töhfə verdiyini vurğuladılar.
Tədbirin sonunda sərgi iştirakçılarına diplomlar təqdim olundu. Bu diplomlar, yalnız bir təşəkkür deyil, həm də onların sənət yolunda atdıqları ilk addımların rəsmi tanınması idi. Diplomların təqdimatı zamanı iştirakçılar arasında sevinc və qürur hissi hiss olunurdu. Tədbir xatirə fotoları ilə yekunlaşdı, müəllim və tələbələr birgə şəkillər çəkdirərək bu unudulmaz günü əbədiləşdirdilər.
Müxbir : Aygün Oqtay
Fotoqraf: Camal