UNEC 24/7 KİTABXANASI RƏQƏMLƏRDƏArzu MƏMMƏDOVA
Azərbaycan Dövlət İqtisad Universiteti (UNEC)
Kitabxana İnformasiya Mərkəzi (KİM) 24/7 kitabxanasının müdiri
Müasir kitabxanalarda fəaliyyət istiqamətləri üzərindən aparılan təhlillər kitabxana idarəçiliyində böyük dəyişikliklərə səbəb olmuşdur. Oxucu-istifadəçi ehtiyaclarının, oxu vərdişlərinin və resursların istifadəsinin davamlı analiz olunması kitabxanaların xidmətlərini daha məqsədyönlü və effektiv qurmasına imkan verir. Bu təhlillər sayəsində kitabxanalar həm fiziki, həm də rəqəmsal resurslarını optimal şəkildə idarə edir, oxuculara fərdiləşdirilmiş və zamanına uyğun xidmətlər təqdim edir. Belə yanaşma, həmçinin kitabxana əməkdaşlarının iş yükünü və resurs paylanmasını daha səmərəli planlaşdırmağa şərait yaradır.
Son illərdə UNEC KİM-in 24/7 kitabxanası fəaliyyətinə datalar üzərindən yanaşaraq, yeni dövrlə ayaqlaşmağa çılışır. Kitabxana müasir analiz vasitələrindən istifadə edərək oxucu-istifadəçi tələblərini dəqiq müəyyən edir, resursların istifadəsini izləyir və nəticədə xidmət keyfiyyətini davamlı yüksəltməyə çalışır. Bu yanaşma UNEC KİM-in 24/7 kitabxanasının fəaliyyətini daha məhsuldar və istifadəçi məmnuniyyətini artıran səviyyədə qalmasına yardım edir. Data əsaslı qərarvermə kitabxananın innovativ və rəqəmsal dövrün tələblərinə uyğun olaraq inkişafına böyük töhfə verir və akademik mühitdə təhsil və tədqiqat proseslərinin dəstəklənməsində mühüm rol oynayır.
