Bu gün şəhadəti ilə əbədiyyət qazanan kəşfiyyatçı leytenant Vüsal Muradovun anım günü keçirilib.
Anım mərasimi Sumqayıt şəhər Şəhidlər Xiyabanında başlandı. Şəhidlərin əziz xatirəsi ehtiramla yad edildi, ruhlarına dualar oxundu, Ulu yaradandan ailələrinə, doğmalarına səbr diləndi. Şəhid Vüsal Muradovun məzarı ziyarət olunaraq gül əkililəri, tər çiçəklər qoyuldu. Leytenant Muradovun komandir olduğu kəşfiyyatçı hissənin əsgərləri, zabitləri onun keçdiyi şərəfli döyüş yolundan xoş xatirələr danışdılar. Anım tədbirində şəhid valdeynləri, Qarabağ qaziləri, Milli Müdafiə Universitetinin kursantları, Baş Kəşfiyyat idarəsinin bir sıra əməkdaşları, Ağdam rayon rəsmiləri, media nümayəndələri, din xadimləri, şəhər ictimayyəti iştirak edirdilər. Şəhidin təhsil aldığı Sumqayıt şəhər Anar Şükürov adına 25 nömrəli tam orta məktəbin müəllim kollektivi, Sosial Xidmətlər Agentliyinin Abşeron-Xızı Regional filalının bir sıra əməkdaşları, Ağdam rayon rəsmiləri, şəhid atası Hacı Əhməd Əhmədov şəhidin ailəsinə baş sağlığı verərək onların dərdinə şərik olduqlarını bildirdilər. Vətənimizin müstəqilliyi, torpaqlarımızın azad olunması naminə ölümü gözə alan Vüsal kimi gənclərimiz bu müqəddəs amal uğrunda şəhid olursa, bu, xalqımızın böyüklüyüdür. Şəhid verməyən xalqın mənliyi olmaz. Şəhid qanı axmayan torpaqdan Vətən olmaz, Vətən sağ olsun! 
Mərasim şəhidin adına açılan ehsan süfrəsində davam etdirildi. Əvvəlcə torpaqlarımızın azadlığı uğrunda şəhidlik zirvəsinə ucalanların əziz xatirəsi bir dəqiqəlik sükütla yad edildi, Azərbaycanın Dövlət Himni səsləndirildi. 
Din xadimlər Qurani Kərimdən surələr, şəhidlik zirvəsinin müqəddəsliyindən, əbədiliyindən, ucalığından söhbət açdılar. Hacı Əhməd Əhmədov şəhidlər haqqında yazdığı şeirləri səsləndirdi. 
V.Muradovun döyüş yoldaşı onun şəhid olana qədər birlikdə döyüşmələrini, aralarında olan səmimi söhbətləri xoş xatirələrlə yad etdi. 
Allah cəmi şəhidlərimizə rəhmət eləsin, qazilərimizə can sağlığı versin!
Hər zaman şəhid tədbirlərinə təmənnasız səs aparatları ilə xidmət edən Sumqayıt şəhər Təfəkkür liseyinin müəllimi Teyyub Sadıqova öz təşəkkürümüzü bildiririk.
Qəhrəmanlarımızı unutmayaq ki, unudulmayaq!
Yeganə Telmanqızı
XeberTıme.az